Maabig Ya’n Kimey
Saray Himno Tan Cancion na Saray Ugogaw, 13
1. Maabig ya’n kimey Dios ko. Mañgigalang, misalamat. Aro’y panengneng ed agew. Bitlae’y katuaan ed labi.
2. Agew painawan maabig. Angapo’y gunigo’d pusok. Onpugta komo’y pirawat. Kalikta’d deen maron Ama.
3. Liket kay pusok Katawan. Idayew tan pagalañgan. Marmarlang iray gracia Yo! Bilin Yo’y ar’lem, masanto.
4. Voces ko manbelway’d liket. Igalang ka’d ’di angaan. Milupaan so pirawat. Lupa’n napno’y kaliketan.
5. Kasalanan, kalaban ko, Angapo la a mañgulo. Ompatey kab’sol ko’d laman, Satanas, ag to’ak nasigen.
6. Dia’d ontan naamtaan ko Ami’y pilalek ko’d mundo, Pakapanyari’y nikana Dima’d ’di angaan a gayaga.